مبارك بن مسلم الصلتي – سلطنة عُمان
من ذا الذي يقــدر يقــاوم حبّــها
في بحــرهــا نــاس ٍ كثيـره مهيّعه
هــايم تـراني في عــديني حبّـها
يـــوم يتقلّـى فــوق نــار مهجّـــعه
من ريحته كسر الخواطر ربّها
واكشــف معــاناةٍ خـــفيّه واقنـــعه
قامــت تحمّــد للإلهــي ربّـــها
يللي هــدى راعــي البهايم واقنـعه
غرّد على الهاون يزافن ضربها
كل ماشيٍ وقف مسيـره وجس معه
لن قال قايل بالسوالف ضر بها
حكي العــواذل مـن يشـلّه ويسمـعه
بدل الحطب نارك بضلعي شبّها
خـلّي لمــا القهــوه نجـومه مشرّعه
عازم عليها من شيــوبه وشبّها
لانها الوحيده اللي خمرها مشرّعه
ياســاقي القهــوه تفضل صبّها
غنّـــم من الــــدّله ثــلاثه واربـعــه
شــربة فنــاجينٍ فــوادي صبّـها
ترجــع إلى رأسي فكــرته وربــعه
هايـم متيّم ما بتـعد عــن شربها
مهجة فـــوادي في هــواها مولّــعه
فيها المنافع غالبه عن شـر بها
لهجرتها جــسمي حـــراره مــولّعـه
يا صاحبي كثـر الهواجس طبّها
اســأل مجــرّب عن أثـرها واطبعه
معنا شهادة من حكم في طبّها
قال اشـربـوها كل واحــد وطبــــعه
