الثلاثية الحكمانية

...
...
...


(1)
علي الحكماني – سلطنة عمان
..................
من دلّةٍ عندي على السيت فكّيت
صوعٍ مضى له يا عضيدي ليالي
//
من بعدها عرّجت للشعر واسريت
أسراء  لكنّ   الوسيله   خيــــالي
//
وتساوقت لي بيت من تلوه البيت
قصيدةٍ  بـ المختصـر شفّ بـالـي
//
وحطّيت فيها فلسفاتي وحطّيت
تجارب الأيّام  واللّي صفى لــي
//
ياما و ياما  فـي حيـاتي تلقّيت
ما جاني أقسى من تغيّـار غـالـي
//
النّاس لو سوّيت فيهم و سوّيت
نادر بهم  لـي  لـ الجمايل  يبـالي
//
والناس بعضٍ ماء والبعض كبريت
( وكمْ خاب ظنّي فالرّفيق الموالي )
//
يا راس مال العمر جدواك قدّيت
وزنٍ ثقـيل  وْ أنت قدّ الثقـــالــي
//
يا شاعرٍ بين العرب شاع لك صيت
ما جبت لك بيتٍ من الدسم خالي

(2)
حمد الحكماني – سلطنة عمان
.....................
فاح الجهاز أطياب ساعة أنا ريت
أبيات من كلمات شاعر مثالي
//
موجهه صوبي وانا قمت حييت
و تقديرها من شخص له قدر عالي
//
شاعر كثر ماني ب شعره تباهيت
ما خيب آمالي من أول و تالي
//
مرسل لآلي بالمعاني استشفيت
ناتج ثقافات و بها صلي صالي
//
الناس يا بو تركي أن كانك اوحيت
أول من ينزل غلاك الغوالي
//
والناس فيهم من ملايك و عفريت
و الرابح اللي نال طيب المفالي
//
هذا الأكيد و لا هو ب قول ظنيت
أفكار صنعة عقلي و من  حلالي
//
و الشعر انا عمه و خاله و له بيت
أو قول هو بيتي و عمي و خالي
//
ظهرت به جدام ما يوم رديت
والمجد دونه حالي و كل مالي

(3)
عبد الله الحكماني
.........................
جاعد وحيد أصدّ في ساحة البيت
والناس حولي  من  يمين  و شمالي
//
اسمع   قصايد  وان  تملّلت  غنّيت
عساه     مالايام       يرتاح    بالي
//
واخذت بالوتساب جوله و حطّيت
عيني على شعرن  عبر  ما  عنالي
//
لكن  تهيّضت  و قصدت  و تسلّيت
بمشاركة   هذا    الثنائي  ارتجالي
//
وانا   عن  ذْياب  الخلا  ما تخلّيت
لو    قيل  متعنصر   فلاني  أبالي
//
أما   عن   الآراء   يا   كمّ  سرّيت
منّي   إليهم   من   قديم   الليالي
//
قلت الخلايج نصف منهم شماميت
والنصف  منهم  قدرهم  فوق عالي   
//
والشعر    يالاخوان  كنّه   تَرَنْزيت
لا  تحسبونه  كلّ  شيّء  و مثالي
//
من    قبلكم    أنا   فدربه  تأذّيت
واللي جرالي  سبّته   هو  جرالي
//
والحين ودّي لو عن ابوابه اقفيت
و ناجيت  ربّي   بالخفا  ما  بدالي
//
امعزّبه  وعيال  و  يضمّنا   بيت
وا  لازم  المسجد صباح و زوالي

 

تعليق عبر الفيس بوك