أسامة أيمن أسعد – مصر
ناجيتك يا اللى خليتنى
ف قلب الدنيا دى مخلوق
ساعات ألقى الحيا حلوة
وسعات بالمر أمر ادوق
سألتك ربى من فضلك
وانا رافع إيديا لفوق
داعيتك ربى من
قلبى وجيت أدعي
ف ساعة شوق
يا رب الكون يا واجدنى
يا خالقنى بدون حاجة
يا خالق نجم و سحابة
يا واجد شمس وهاجة
يا رب اكرمنى واهدينى
ونور ف الطريق عينى
ومن افضالك اروينى
لفضلك روحى محتاجة
يا رب الخير يا واهبنى
بأرزاقك
انا راضى
بنورك تمشى أيامى
و احسانك اكيد زادى
دا لما الزنب يملكنى
و يملى ف قلبى وشعورى
ويقدر إنه يهلكنى
بيستر رغم اعراضى
نزيه الشأن سبحانه
رفيع القدر و الغاية
وليه حكمة منعلمهاش
وإحسانه بلا نهاية
بيتنزل ف جوف الليل
ويغفر لك زنوب اليوم
وبيدبر شئون الكون
ولا تاخده سنة ولا نوم
بنخطئ ف الطريق ديما
وبتتوهنا دنيتنا
ونشعر اننا ف عزة
مع ان الدنيا زلتنا
غريبة الدنيا و الايام
حقيرة بدون إيمان بالله
ولو عندك كنوز الكون
و عندك كل ما تهواه
بنسمع كل يوم ديما
ونعمل برضو مش
سامعين
كتير م الناس بينتحروا
وثروتهم تفوق ملايين
و ناس الفقر واكلهم
ولكن ........
هما بيه راضيين
تشوف الضحكة ف
وشوشهم ف تحسب
ان فيهم غنى
برغم الفقر ف بيوتهم
يشوفوا ان الحياة ممكنة
يناموا ببال بدون أحمال
قلوبهم راضيه متطمنة
بحمد الله وتوفيقه
هتملك كل شئ و اكتر
و رزقك راح يجيك دوغرى
وتلقى الخير بيتحضر
فلو حسيت غياب الفرح
وان الحزن طال بمداه
وأنه خلاص مفيش مخرج
ومش قادر تعيشها حياة
هقولك كلمة لو تتقال
يموت الهم راح تنساه
بكلمة بسيطة راح تسعد
وهتكون لك سند ونجاة
و لو تسالنى ايه الكلمة
هقولك قول رضيت بالله
