خالد محمود – مصر

.. حَــطّ الـتـعب
.. على جـتّـة القلب النبّى
.. سابـت ملامـحـك ضلها
.. ونـهـجـة وراك
.. من قد إيه
.. ناويه الحكايه تـبـتـدى
.. تدخل قصيدتك بالمُحَال

.. ولـحـد فـيـن
.. روحـك هاتـقدر  ع الصمود
.. هىّ الملايكه فى وصفها
.. هىّ البراءة فى العيال
.. هىّ الـحـدود
.. لـجُـمـوح وِدَادك
.. لما قـلبك يـنـتـشـى
.. من لهفة الحلم المُتاح

.. عـطَرنى بالحضن الوسِـيع
.. ودّينى للوجــد البراح
.. يمكن حـنـيـنى معاك يـُجود
.. يمكن تهدهدلى الصَهـيل
.. واخشع فى ركعه فى حضنها
.. وابـدء أعــود

.. الناس بـتـضحك
.. من بٌكايا فى الغياب
.. والسرّ ضاقت بـيـه
.. أماكن الاحــتـمال
.. ضُـهـريه دى ولاضـباب
.. ياسمـيـنـه ولا صبارة رحـيـل
.. زمـنـك بـخـيـل
.. بـيقـطَّـر الراحة لروحك بالحساب
.. وانت العـطـش
.. شـقق جروحك وارتـضيت
.. دور الضحيه
.. فى مشهد الزمن الردئ

.. مفطور عليك
.. قلب الطريق
.. صوت الخطاوى اسـتـعطفك
.. ترحم غُـناك م السرسبه
.. رايـح لـفـيـن .. ؟

.. مابقاش بـجد معاك جديد
.. درج السلالم فى الطلوع
.. مابقاش يـطـيـق الدبدبه
.. كل اللى فاضل
.. ضـل باهت
.. من ملامح واد عـنـيـد
.. لوحـة مشاعرك من زمان
.. مـتـعلـقه
.. فى متاحف الناس الرُخَـام
.. إوعاك تــصدق إنها
.. تقبل تـساعك بالكلام

.. يامين يـعـيـدك ياسنين
.. ويهد فى حدود الفواصل
.. والحواجز والتواريخ القديمه
.. الــسـور مَـهُـول
.. وجناحك العاجز يفوت
.. فَضَل يموت
.. مكسور على عـتـب اللُقا

.. يادى الشقا
.. قلبك ياسمان البحور
.. كل الموانى بترفضه
.. طارداه المُدُن من قلبها
.. وازاي هايفلت من شبك
.. قاطع طريقه بالغيام

.. الـغـيًـه دى مش للحمام
.. اللى يحب الرفرفه
.. من غير ميعاد
.. الـغـيًـه دى
.. عـشـة رُقـاد
.. لطيور بتقدر ع المواسم والفصول

.. صــدرك مَـلُول
.. والصبر دُكّانه خليِّ
.. خـلـيك وَلِي
.. واعـشـق لآخر مُـنـتـهاك
.. واعزف فى لحن ماينـتهى