أحمد أبو سِنّة – مصر

وآدي إيديا عَلى عِيوني
وآدي رموشي ومقفوله على جفُوني
وغَمِتها
ومِنْ واحد لحد  العشرة.. عدتها
وهستناكي جوَّه الميس
لحد ماتجري وتغيبي
واسمع ندهتك ليا ... خلاااص خلاوييييص
//
(وااااااااحد)
سامع نفسك المقطوع
وروح شارده ماليها الجوع
وانتى بتبعدي عني
وفى عنيكي
بقايا دموع
//
(اتنييييين)
بدأت أحس ببروده
كما قمره فى عز الضلمه مطروده
كما  ايدينا فى عز الفرقه مشدوده
وبتصارع حياه روحنا
عشان بوحنا
واثباتك واثباتي
كيان واحد .. وموجوده
//
(تلاااااته)
وفاكراني.؟
وفاكرة صوتي جواكي
وحاسه بروحي وكياني
وبِتغيبي وبتسيبي
حبال صوتي
وبرضه لسه عارفاني؟
//
(أرررربعة)
بعدتي كمان
وريحة قلبك الدافي
بقت ذكرى
وبعرفها من الريحة..
وم الالوان
من الساعة... من الازمان
وبتخيل لفين ماشيه
وبتخيل حيطان بيتك
وبتخيل قوي العنوان
//
(خممممسه)
خلاص غِبْتِي وبتغيبي
واتْخَلصتِي مِنْ عِيبك ومِنْ عِيبي
خلاص ماشيه
فى سكة جديده ماعرفهاش
خلاص عايشه
فى دنيا جديدة ماافهمهاش
عشان عمري انا وانتي ماعشناها
ولا لمست ايدينا في يوم لهواها
خلاص قربت انساها
عشان غبتي كتير جداً
وقلمي وقلمك الصاحيين
منتظرين
كمال رسمه
رسمناها
//
(ستتتتتتتته)
يا حته مني مقسومه
وجملة غريبه ماافهماش
لكن واضحه ومفهومه
ورسمة جميلة سيريالي
وجملة ناسيها على بالي
لكنها صح .. معروبه
بصوت روحك
ولون روحي
ورشة ميه تحيينا
بصوت طوبه
//
(سبببببعه)
ومش شايفك..
ولا شايف..
عنيكي المدموعين بفراق
لكن عارفك
ومش فاهم حاجات ياما
لكن فاهمك
وقلبي وقلبك الأغراب
ليه أحباب؟
وانا وانتي بنتحاسب على فراقنا
ابص فى ايدي وتعيدي
تبصي فى ايدك الفاضيه
نلاقي سراب
//
(تمااااااااااانيه)
انا زيك
بعيش فى اللحظة ميت ثانيه
بعيش فى الثانيه حلم حياه
وادوق الآه وامسكها وارسمها
حياة تانية
فى جزء الجزء من ثانيه
بقول اسمك واشوفك فيه
واخبيكي واضم عليه
من الدنيا
كيان مخفي
بشوفك فيه ..
حياة باينه
//
(تسسسسسعه)
بتِسِعِي كتير وانا بسعى
ونرجع تاني من كلمة ومن مسحه
على قلبي .. يحس براح
عشان يرتاح
ويتحول نظر دنيا
ويتحول مقاس ثانية
كتييير  واسعه
خلاص ووصلت
للتسعه
//
(عشراااااااه)
ولا سمعتش خلااص خلااويص
وانا لسه فى حضن الميس
ومستني
افتح عيني والقاكي
بعيد عني
ومن تاني هدور فين
وهسأل مين
ومن تاني تدوب عيني
من التدوير على العناوين
وهمشي فى سكة مجهوله
مافيها رجوع
وامشي وأسال الماشيين بصوت همسه
وصوت مسموع
وشيلت ايديا عن عيني
لفحني هواكي فى جبيني
.........................
واقفه ولسه بتعدي
وفى عنيكي بقايا دموع