مينا ملاك | مصر
سبيني احلم
وانام بالحلم في عنيكي
واعلم قلبي يستسلم
واغنيلك واغنيكي
واتوه في النني واتدروش
وف عنيكي ابات سكران
ومهما شربت من تمرك
علي خمرك هموت عطشان
وهستني اصلي الفجر في عيونك
وانام ساجد علي صوتك
واعلم قلبي يتوضي من النني
ويمسح ايده في رموشك
ويحضن ذبذبات ضيك
ويرسم من عطورك نور
ويحضن قلبك الدافي
ويتعدي في عنيكي بحور
ويتداري في خزين الشوق
ويفرد ايده بالمواويل
ولو مرة زرعتي الشوك
هيفرش قلبي ليكي النيل
لو كانت الارواح بتولد
كان زمانك ام ابني
اصلنا لو مهما نبعد
جوة قلبي هقوم وهبني
ولو هفرش دروب قلبي
تملي الماس ما يكفيكي
ولو قلبك طرح بستان
انا بدمي اللي هرويكي
ولو فرحي طواه الليل
هقوم الحق خطاويكي
ولو حافي ووراكي الشوك
انا وقلبي نسليكي
ونضحك للنصيب مرة
ونبكي الحزن في عنيكي
