نهال محسن – مصر
في ناس سعادتها لحظة نجاحها
بتطير لفوق وتفرد جناحها
وناس سعادتها مساعدة غيرها
ولا تِبخل أبدا بكل خيرها
وناس سعادتها نضال وكِفاح
لجل تجيب لبلدها فلاَح
وناس سعادتها دانه ومدفع
عن اراضيها العدُو تدفع
وحد سعادته مجرد دفا
في حضن عيلته الي بيها اكتفي
وساب عشانها غربة سنين
ولو هييجي منها الملايين
وحد حلمه مجرد شُغله
يجيب بيها لولاده اللقمه
واحده سعادتها تربّي عيالها
وتحقق فيهم كل آمالها
وطبيب سعادته يشفي مريض
وحبيب سعادته ف لمسة ايد
وناس سعادتها في الويسكي
وناس تانيه ف حضنك تبكي
وناس سعادتها تكتب شِعر
وناس سعادتها تحفظ سر
وموظف سعادته يرضي سعادته
لجل يرقِّيه وتعلا علاوته
وخلاصة القول: (السعاد نسبية)
تفرق منك ، ليه ، ليا
وعلي كلٍ ، ربنا يدِّينا
ويديم السعاده عليكم وعلينا
