نهال محسن – المنصورة - مصر

وحلمت بدنيا بتشتي وسامعه صوت الرعد
زوبعه رهيبه بره الشباك وشوارع مفيهاش حد
واشتد المطر .. والبيت انغمر
وصحيت خايفه من النوم
لاقتني قعده.. سارحه وشارده.. من مصر للخرطوم
أتاريني صاحيه .. ولروحي واعيه.. والزوبعه جوايا
والدنيا دافيه والشمس طالعه والناس ريحه جايه
زوبعة صراعات .. بين ماضي فات ومستقبل مجهول
يا فيه أكون . أو لا أكون. لاقتني لنفسي بقول:
هتجاوز الزمن بآلة الزمن وانط للمستقبل
وكإن الماضي ماكان ف حياتي. أنسِفُه بالعافيه واكمِّل
واشوف ايه مستنيني هناك واعافر معاه واغلبه
أنا مش ضعيفه. فعلا مخيفه. ارادتي حديد تِوئِدُه
أنا بنت صلبه. عنيده حره.. عقلها يوزن بلد
وانتو كمان.. قوة زمان فيكو بنت أو ولد
فتش ف روحك هتلاقي جواهر جوا الزوبعه
فتَّح شبابيك.. شمسك طلَّه.. اخرج من الصومعه
ده بعد الرعد والمطره بيطلعلك قوس قزح
لوِّن حياتك بيه وقت التحدي أزف
وخد من ذوبعتك درس.. عيش بالإرادة وبس
واركب آلة الزمن ونط بيها للمستقبل
وادعي ربك دايما عمرك بتوفيقه يكمل.