محمد ربيع محمد | مصر
صباع الروج اللي اتعود
على إنه يصافح شفايفها
مش قادر أبدا يتخيل
لو يوم اتغرب وفارقها
رغم إنه بيستنفد طاقته
ويسيل كما شمعة
ف ليل شاتي
وفرولة سكرها الطاغي
بتشاور للقهوة السادة
تتحول للشهد الصافي
وجناين شوق
طرحه الضحكة
وخدود من أطعم تفاح
وصباع الروج اللي عشقها
مش عايز يظهر له عزول
وسعيد لو تحتله أنامل
وتعلي على السهل السور
مسجون العشق بيتعذب
من ضجر الشوق الفتاك
سكران من خمرة عنقودها
وتراوة روح الإحساس.
