أم الشهيد


د. أحمد مرسي | مصر

يا أمي انا مسافر
وجب عليا الدفاع
عن أرضي وعن ديني
يا أمي دي وصيتي
إرضي كمان عني
أرجوكي سامحيني
دمعك كتير يامّه
والدمع دا غالي
ناره بتكويني
إنتي اللي قلتي لي
دي مصر دي أمنا
وهي نور عيني
في كل ثانية مضت
شايف أنا عمري
قدامي يتسرق
أنده بأعلى صوت
ولا حد سامعني
وصوتي يتخنق
حاسس بنار صاهدة
والقلب فيه بركان
وكأنه يتحرق
ماعدش لينا اختيار
إما نصون الديار
وإما نفترق
يامّه السلام موصول
لابويا واخواتي
أنا كنت واهب لكم
أيامي وحياتي
ولسة فاكر كمان
أحـلامي مابينكم
دي أجمل ذكرياتي
راضي بحكم القدر
ف ميلادي ومماتي
يا أمي دي بلادي
مذكوره فى القرآن
قالت لنــــــا ولادى
يلَّه امسحوا الأحزان
بان الخسيس والأعادى
والمجد للشجعان
عرفنا مين العصابه
وعرفنا مين الجبان
عرفنا مين الملاك
وعرفنا مين الشيطان
لازم تمر السحابه
ونحفظ الأوطان
من كل ظالم يا أمى
كأننا ف غابة
فداكِ روحى ودَمِّى
من كل غدر الديابة
مدد ياسيدنا الحسين
حواليكي ياسيدة
خمسين رصيف للغلابة
عارفة يا أمي
لقيت ملايكة كده واقفين
وبيفتحوا الأبواب
كأنهم خايفين
لو حد جه مسني
أو صابني أي عذاب
الجنة يا أمي
تربتها متعطرة
وجمالها فوق الوصف
ومجمعة الأحباب
زغروتة يا أمي
إبنك رفع راسك
وبقالنا إسم جديد
بقيت شهيد يامّه
وبقيتي أم الشهيد
مستني ف الجنة
وحشاني رؤياكي
والشوق هنا بيزيد
يارب ألقاكي
ف الجنة ياغالية
وقولي لاخواتي
يحافظوا على أرضي
دا مصر يا أمي
أغلى ما ف الدنيا

 

تعليق عبر الفيس بوك