مينا ملاك | مصر

لابد في يوم هنتقابل
وتحكيلي
بإن الجنة مش واسعه
وإن يهوذا مش مبسوط
وإن المذهب الأول
لموت الحب هو الموت
لا بد في يوم هتستني
نجوم الليل تغنيلك
وشجر الورد يطرح توت
لابد في يوم هتعترفي
بإن القطر عداكي
بدون ما القطر يعمل توت

هو انتي ليه
كل اما أقرب تبعدي
هو انتي ليه
عاشقة الفراق والحزن والخوف والوجع
طب خايفة ليه تتنهدي
ولا انتي من كتر البعاد
مش عارفه ايه اللي اتولد جوه القلوب
انا مش ضريح للأوليا
هو انتي ليه بتحرمي كل الذنوب
الذنب دايما مستباح
اذا كان اليكي أو ليا

انا مش وحيد
السكة لحفان الجحيم
مليانة اصلا معجزات
وان كان علي القلب اللي مات
لساه بيحيا بالجراح
فارد رماله ع الشطوط
فارد سكوته ع السكوت
شعب اسرائيل حالف بأن الانبيا
 من شعبه بس
وانتي اللي جايه م الشروق
عماله برده تحلفي
أن انتي شمس

هي الملايكة الواقفة علي باب السما
هيدخلوني ازاي وليه
ياعم دنقل اهتدي
موت القمر
مش ذنب نتعاقب عليه
خوفك بأن الفجر يصبح معتقل
ويفارق الحزن اللي حاضن بسمتك
خلاكي دايما تبعدي
وكأني طفل بيحضنك من غير ايديه

موتك ده مكسب للسما
وانا جاي بكرة وهحضنك
من غير عتاب
من غير حساب
اوعاكي مرة تفكري
اني هقولك غبتي كيف ؟!
أو رحتي فين ؟!
أو ليه الغياب ؟!!

عارف باني مش نبي
ولا حتي قلبي المستقيم
يكفيني ادخل للسما
يا كوكبه
من نرجس العهد القديم
يا كوكبه
من نرجس العمر الصبي
ضمي الكواكب والنجوم
ولحد ما يقيموا الاذان
قيمي الصلا