أحمد أبو سنة | مصر
جرالك ايه ؟!... مالك .... ؟!
إيه اللى مشقلب كده حالك ؟
بتسبني وتبعد عني بعيد
ويوماتي مافيش فيك أي جديد
إيه اللى مغير احوالك ... ؟!
مالك .... ؟
فين صوتك لما بتضحكلي
وايديك بالقلب تشبكلي
والحلم يوماتي انت معايا
وفايتني لمين أحكي حكايه
مش هقدر أفسر في رموزها
ولا بسمه بتيجي أما نعوزها
وفى لمعة عين آجي في بالك
مالك ....؟
مليت م الغربه اللى معايا ..!
مع كل نهاية في بدايه
ومافيش ولا بر بنوصله ..!
والامل الضايع ننزله ..!
وسنين بتعدي وننساها ..!
بتزود حملى و أحمالك ..
مالك .... ؟!
هترد عليا في اسألتي
طب هفهم حل لمشكلتي
طب شاور لو مش هتقولي
ماانا عارفك زيي اما تملي
بطلع م الخنقه اجيك حالا
تلاقيني ساكت قدامك
مالك ..؟!
......................
أنا شايف دمعك في عيونك
وفى قلبك ضحكه بتخونك
مش قادره تظهر في شفايفك
ولا قادر أكون فعلا شايفك
وبتهرب من بكره بيومك
وبتكره كل اللى يلومك
لكن احساسنا اللى انا عارفه
حالى دايماً بيكون حالك
فياريت تسكت ماتعيطشي
علشان بتقطع جوايا
كان نفسك فيه ماتحققشي
كان نفسي كمان يبقي معايا
بس اما سنينك سرقتني
وخدتني منك وشالتني
انا زيك بسأل عن حالك
مالك ..؟!!
