أحمد أبو سنة | مصر

ولا هنساش
انا لسه هنا فاكرك
لما كنت  بتقوللي
اذا ظلمك خسيس واجهه
وماتترجاش
واذا رفع الايدين يضرب
ماتستناش
وربتني على اني اجيب حقي
ولا اتوصاش
أصيل انت ياعُبد الورد
حبيبي يااخويا
وحشاني السنين دي  بجد
فاكرك وانت بتفصل
هدوم القصة ع الموضه
وفاكرك وانت بتنقي
من الترزي وم القماش
وفاكرك وانت  بتقلب كراريسي
وتتضحك لما بتشوف النجوم ليا
في كام كراس
وفاكرك انت واصحابك
لما كنت تندهلي
وانا بكبر على مهلي
اشوف الماتش وياكم
وحببتوني في الأهلي
انا فاكر صور بيبو
وشطه وزيزو والمجري
وصرخة كنت أخاف منها
عشان  بحماس
ماكنتش فاهم الموقف لكن فرحان
بلمتك انت واصحابك
في بيت عنوانه جميزه  وفرن امي
وشخبطتي على الجدران
اول جمله اكتبها كانت منك
ودي حقيقه .. لرد كلام كتير عنك
زمان علمتني افهم
وازاى اقرا في الجرنان
ولما كبرت وكبرنا
خدتنا الدنيا وياها في سنين غربه
ومالا حظتش بياض الشعر والشيبه
في وسط الغربة والأحزان
انا ياعبده متيتم
وموتك زاد عدد الايتام
وبترحم على طيبتك
ومش لاقي يااخويا كلام
انا مش قادر استني
وعارفك لما توحشني
هتيجي تزورني في الاحلام.