نهال محسن | مصر
مين فينا مش طماع
وعاوز كل حاجه
ستر وصحه وعيال
فلوس وعيشه ألاجه
بس ليه باصص للي ناقصك
وناسي اللي معاك
ولا مره تحمد ربك
مهما بكرمه عطاك
وليه ف نعمك يا صاحبي
عمال تداري وتخبي
مهو زي ما عطاك عطاهم
ولا تعرف ب ايه ابتلاهم
اعقل يابن آدم
وارضي باللي اتكتبلك
ده مقسم الأرزاق
بيديلك وياخد منك
عشان دايما تلجأ له
تدعيه وتبتهل له
احمده عاللي في ايدك
غض بصرك عن رزق غيرك
إتأدِّب مع ربك .. وارضي باللي اتقسملك
مش بقولك متحلمشي يبقي عندك كل حاجه
ولا قلت ان الاماني خيالات او سذاجه
احلم واسعي لحلمك ، وكون في التصميم مدرسه
ساعتها تنول مرادك ، حاول ... لعل وعسي
