أسامة أيمن أسعد – مصر

مهما أقو ل ف الحب واحكي
برضو راح يفضل كلام
حبى طاير بجنحاته
ف السما وايا  الحمام
جوا منى و ف كيانى
صورة اجمل م الخيال
للى مالية وشاغلة بالى
واللى خلت قلبى مال
فرحى يبدأ لما اشوفها
والقدر يجمعنى بيها
لما عينى تشوفها
جاية بشعر ان عيونى
ليها
لما عينى تشوف حبيبتى
الدقيقة تفوت سنين
قلبى يبرد مرة واحدة
ضغطى يعلى يفوق ميتين
وابقى شايف الناس طشاش
بنسى كل الموجودين
وألقى قلبى يفيض كلام
بس ساكت م  الحنين
حتى لما تغيب عينيها
حاضرة ديما جوا قلبى
برضو  لما  تكون بعيدة
ببقى حاسس بيها جنبى
مش غريبة القلب يفضل
حبه فيه رغم البعاد
رغم ان النا س بتكره
بالبعاد انا عشقى زاد
حبى مش مرهون بكلمة
حتى مش محتاج "بحبك"
بس طبعا ليه ملامح
وبدايتها بإنه يربك
واللى عاش الحب عارف
ايه بيحصل للقلوب
لما تعشق ف البداية
عشق للاشواق بيملك
لما بسمع صوتها صدفة
ببقى هايم من ساعتها
و انسى كل الدنيا
فجأة القى نفسى جنب بيتها
وابقى نفسى بشوق اشوفها
باصة من شباك اوضتها
لما حظى يكون ف صالحي
بتهادينى بإبتسامة
محلى صوتها لو ينادى
فرحى لما تقول اسامة
بشعر ان ف اسمى حاجة
لحن دايب ف المعانى
لما بسمع اسمى منها
ببقى نفسى تقوله تانى
عودتني ع الصراحة
ف للقصايد والاغانى
علمتنى ازاى احب
ازاى اكون ازاى اعيش
مهما انسى ف ذكرياتى
ذكراياتها متتنسيش
هى وردة ويوم م تزعل
كل ورد الدنيا يدبل
بس هى جمالها يفضل
مهما يجرى مينتهيش
والدموع ف عنيها تلمع
زى ندا ع الورد بدرى
يستحى و الناس فينزل
ع الخدود وبسرعة يجرى
قلبها الصافى ف طيابته
يحتوى كل الغلابة
يرتوى من بحر عطفه
كل من يحتاج طيابة
حتى جوا الحلم
اشوفها زى حورية
ف بحر نور
وشها ابيض منور
حته م اجمل بدور
بتنادينى بأسمى برضو
فأجرى ليها بشوق ولهفة
بس لما خلاص أقرب
القى بيني وبينها سور
تيجى زى حورية ف بحر نور
من ساعتها وقلبى شارد
قلبى سارح ف اللى حاصل
هل انا عاشق حقيقى
هل فقلبى الحب واصل
هل أقول احساسى
ليها وللا دا هيجيب  مشاكل
رحت للدكتور اقول له
كل دا و حكيت حكايتى
قلت له شخصلى حالتي
يمكن اعرف وأنهى حيرتى
قالى يا  ابنى الحالة صعبة
والإجابة جوا قلبك
السهر والشوق طبيعى
و الخجل هو اللى حجابك
بس باين من كلامك
واللى قولته عن حكايتك
ان كل الفكرة واضحة
وان  دى اعراض لحبك
لما سبته انا كنت حاسس
ان حاجة بجد ناقصة
وانى عندى الف كلمة
متقالتش و باقية لسا
فجأة جات ف دماغى
جملة فهمتنى معنى هام
انى مهما أوصف ف حبى
حبى طير و يا الحمام
مهما عنه  اقول  واحكى
برضو راح يفضل كلام