نهال محسن – مصر

لما بريق عنيك ينطفي،  والدمع يا عين تذرفي.
لما يصبح وشك شاحب، والحزن ع الفرح غالب.
إتفائل.
***
لما تلاقي نفسك قلقان، ومن القلق ما بتنام.
لما أحلامك تتوه منك، وتتألم غصب عنك.
إتفائل.
***
لما اليأس يمرَّر قلبك،  والحبايب تبعد عنك.
لما الوِحده تملا أيامك، والأمل سراب قدامك.
إتفائل.
***
لما الثواني تطول عن الساعات، وتتمني يرجع اللي فات.
مستني القطر يجيك، ولا عارف ايه مستنيك.
اتفائل.
***
لما تحس إنك مرفوض، والعمر بيك بيفوت.
امبارح زي انهارده،  انهارده زي بكره.
إتفائل.
***
لما زي وهاب تغني، ( طول عمري عايش لوحدي)
وزي درويش ياحسره،  ( زوروني كل سنه مره)  
إتفائل.
***
أيوه،،  اتفائل
ايه ممكن يحصل مين عارف!! حد فيكو بكره شايف؟  
مش ممكن الحزن يمضي،  ونور الفرح يضوي؟
ممكن يبقي سحابه وتعدي، ومطر الحزن يمشي.
وتشرق شمس دافيه، جايبه الأمل وجيه.
بعد ماكان سراب، هيدق علي كل باب
اليأس اتمكن منه، ياخد بإيده ويشده
اليأس ده آه منه..
صياد ماهر للعزايم،  واللي في العسل نايم.
إبعد عنه واهجره، اقضي عليه،  إوئده.
ممكن ولا لأ ؟ ..  إخطف الأمل متقولش لأ.
اتحدي نفسك وقوم،  كفايه حزن ولوم.
انسي الحزن الماضي،  مهو قالها لك أبو ماضي.
"وتري الشوك في الورود وتعمي أن تري فوقها الندي إكليلا"
إضحك متبقاش بخيلا.
يعني اتفائل وافرح، ومن حُطام يأسك إجمع
فتافيت، يمكن تكوِّن،  صوره جميله للمستقبل.
اتفائل انت وهو، من قلبك كده من جوا
صدقني مش هتندم، يلا اتفائل واتبسم.