نهال محسن – مصر

ايوووه على بنت اسكندريه
ايوووه على الميه المالحه
ايوووه ياحلوه علي جمالك
وعيونك المليانه فرحه
رماديه هي بلون البحر
وبتقلب اخضر... تقولش سحر
والشعر دهبي بلون الشمس
يا آه .. ياربي .. جمال محصلش
وعود مانيكان . مارلين مونرو
طيَّر لي عقلي ياخلق ياهوووو
وملايه لف كده بشخاليل
نازله تتدلع من الحنطور
ومن تحتها باين كرانيش
فستان مدندش كده كزا دور
شافها الحصان اداها صهيل
وصاحبه غنّى (ياعيني ياليل)
وفجأه نسمة هوا هبت
نسمه طريه العصريه
اتاريها اليشمك رفعت
سحريه بنت الجنِّيه
صادتني بشباك اليشمك
هجرتني ف الشبكه بهاتي
جمالها قاتل يخواتي
مقدرش اقاوم .. مش قادر
رنة خلخالها دي مشاكل
لحد ماراحت من قدامي
ووقفت زعابيب تسونامي
ببص جمب البحر لاقيت
كيلو جمبري واتنين صبيط
مع ست ريا البياعه
دي نازله ضحك من ييجي ساعه
اتاريها شايفه الي جرالي
ونا ولا دريان ب
ومشيت سعيد وروحت البيت . سويت
الجمبري عالصبيط
وطول منا قاعد اتغدى. بفكر في لهطة القشطه
وايووووه عليها بنت اسكندريه
اييوووووه علي الميه المالحه
ايووووه ياحلوه علي جمالك
وعيونك المليانه فرحه