أحمد أبو سنة – مصر
سيبك انت من العتاب
والكلام اللى بيملوا بيه الورق
ويقولولك ده ..... جواب
سيبك انت من الغريب
واللى مهمها يكون موافقك
برضه سيب ....
وبص حبه على الصحاب
اللى كنت معاه تملي
واما جيت تحتاجله مره
برضه غاب ......
سيبك انت من الوطن
ومن المواطنه ....
من القطر اللى مصمم تركبه
وهو بيتعمد يفوتنا ....
من ايديك لما تشتاق للسلام
والبكا فى حضن الكلام
وانت ماسك حُب فيه
وهوَ ساب .......
سيبك انت من البلد ومن القرايب
ومن النسب ومن النسايب
حاجات كتير حصلت مابينهم
وانت غايب .....
و اللى انت شايفه انه سابك
برضه هو لسه شايفك
زيه سايب ....
الغربه قتلت فيك وعود
ماكنتش متخيل تموت
زي شوقك للبيوت
زي دمعه فى العنين
لما بتفكر تعود
طب قولي بس بذمتك
فاكر ملامح حتتك
والمشي بالليل فى السكك ويا الصحاب
احلامك الهبله اللى كنت تخطها
فى ضهر الكتاب
الخوف من الضلمه قوي
ومن نبح الكلاب
يووووووووووه
الغربه بعدتنا قوي
والقرب بيجيب اكتئاب
