سعيد شحاتة – مصر
مفتتح:
أنا صلّيت ما أمّنتش ورا غيرِك
أنا أمّيت ولا اتأمِّتش من غيرِك
أنا اتعلمت أقول حاضر
................ لتوتك ولعصافيرك
وانا اللي عملت "قلبي حجاب"
............ وعلّقته ف مساميرك
***
عشان خاطرك
وخاطر .. كل من شاطرك فى أحزانك
وخاطر ..كل من طبطب
....... فى ساعة الخوف على حصانك
وخاطر كل من حبك
وداس على شهوته وصانك
وخاطر كل من زانك بعقد النور
وخاطر كل من لملم غناوى الدور
وسبسب لك قصايد شعر
وخاطر كل من علّى ف هواكى السعر
وخاطر
كل خصلة شعر بتحاول تبوس النيل
وخاطر كل واد خيّال
مسلّم لك لجام الخيل ... ومتحنى
وواقف بين حارات القلب بيغنى
وبيوحّد وبيتَنّى ف جمال الروح
وبيحاول يبوح لعنيكى بالمعنى
وبيحاول يدوس بإيديه
على ضلوعك وف ضلوعنا
عشان يفتح فى أوجاعنا الكلام والبوح
ويفرد للغلابه شراع
........ نسافر في المدى المفتوح
نقول الكلمه زي الطلق
مرار م الحلق يحيي الخلق
........... يطرح وردنا المطروح
ولو كان الكلام أصلا ماهوش مسموح
ولو كان الكلام طالع بصوت مبحوح
بيفتح طاقه للمدبوح وللساكن
بيفتح طاقه للكلمه
اللى لابده ف قلبك الماكن
بيفتح طاقه للتغيير
تبدّل دمك الداكن بدم جديد
بيفتح طاقه للطفل
اللى مستنظر هدوم العيد
بيفتح طاقه لجريد السما والضى
وللقلب اللى مقتول حى
وللبنت اللى واقفه هناك
....... بترقص فى الزمان الجىّ
وللناس اللي زي الناس
............ وللناس العيدان النيّ
وللروح اللى مالهاش زى ع الساحه
عشان خاطرك
يا بنت الإيه يا فلاحه
يا تفاحه... يا وش الحور
يا ريحة الأرض والطينه
يا طعم البندر المعمور
يا نبض الشاعر الساكت
يا قلب العاشق المكسور
عشان خاطرك يا علامه
يا منقد مستكه وبخور
عشان خاطرك يا صوت الناى
يا صندوق أوليا وندور
يا عود بنّور
بيرقص فوق كتاف الشمس ع اللسطاح
عشان خاطرك يا بنت الإيه يا فلاحه
بقيت فلاح
بقيت بلبل تقى وصدّاح
بقيت آيه وبقيت إصحاح
بقيت ورده وسما ومدّاح
بقيت ضحكة صبايا ملاح
بقيت مينا وبقيت سوّاح
بقيت تعويذة الإصلاح فى بطن البور
بقيت كلمه ف حنك " سليمان "
وفصّ الخاتم المسحور
بقيت دبور بيرمح بين خلايا النحل
عشان خاطرك بقيت طوبه
تعدّى عليها وسط الوحل
بقيت المكحله والكحل والزينه
بقيت التوته والتينه ورغاوى الشاى
يا بنت الإيه يا فلاحه يا صوت الناى
عشان خاطرك
بقيت ما أعرفش إيه وإزاى
وليه لمّا أنفتح فيكى بكون رغّاى
وأكون حكّاى
وباخرس وأنكتم خالص
فى لحظة لما تبقى معاى؟
يا حاطّه دماغى فوق صدرك
وضمّه بحكمتك أعضاى
يا وخدانى ليمّة فوق
وأنا معاكى ومانيش ويّاى
كإنك آى وطالع للسما السابعه
يا بنت الإيه يا فلاحه
يا شايله الشّلق والرُبعَه
يا بنت الإيه يا فلاحه
يارافعه الرايه
ومتابعه الأصيل والدون
يا فاتحه ف قلبك المسكون
سكك للعشق والمغنى
وفارده ضفايرك الناعمين على اكتافهم
وراسمه كفوفك الطعمين على صداغنا
ودايره تطبطبى بإيديكى
فوق من ضهر لدّاغنا فى ساعات الموت
ورغم دا كله بنحبك
ولو هنحب بالنبوت
وبنحبك بصوت عالى
وعاشقينك بعلو الصوت
وراسمينك عيدان كبريت
فى وش المارد المنحوت على الحيطه
يا بنت الإيه يا فلاحه
يا لابسه قلوبنا برنيطه
ولمــّانا مع القباقيب فى حوّيطه
وبتدقّينا فى طرمبيطة العشاق
تهون الروح عشان خاطرك
ونعشق عشقك الحراق
ونطلع من زقاق روحك نخش زقاق
يا حبّة مش وقت الجوع وعيش ورقاق
يا عود جلوين وجميزه ولُقا وترياق
يا قاعدة قلب ع الكورنيش
وترنيمة رغيف العيش
وكفّ محبه من درويش
وتحويطة رباب ونياق
يا إيد منجل في ساعة الموت
ووقت النصر راس سرّاق
يا صوره بتحضن المشتاق
فى وقت التوهه والضلمه
فى قلبك ببدر الأشعار
ومنك باقطف الكلمه وحصيد الخير
يا قلب كبير
بيفتح صدره للشعرا
................. وغناوى الطير
وللصيّاد ... وللعصافير
و للحادى ... وللمزامير
ولفطير خالتى ستّوته
يا قلب كبير
على صدرونا وعلى هدوم كل بنوته
يا قلب كبير
باشوفه ف كل غنيوه
......... وباحسه ف كل حدوته
............... وباشمّه ف نوتة الغايبين
يا بنت الإيه يا فلاحه
" يا عقد الفل والياسمين "
يا ريحة الطين
وطعم الميّه فى القلّه
وهمس الحب تحت ملامح الضلّه
يا بنت الإيه يا فلاحه
يا خوخه بتحرس السلّه من الحراس
يا قلب بيشتهيه الناس
يا رجلين لما تحضن سكّه
بتحوّل ترابها لماس
يا عشق المغرم القادر
وصوت الساكت المنداس
يا بنت الإيه يا فلاحه يا تاج الرّاس
يا فرح القلب والإحساس وصرخة روح بشر حُرّه
يا بنت الإيه يا فلاحه
يا فرح القلب يا مسرّه
يا ريت تاخدينا أحبابك
ولو هنحب من برّه
يا ريت تاخدينا أحبابك
ولو هتحبي مضطره
عشان خاطرك
وخاطر كل من شاطرك
وخاطر كل بصمة خير
رسمها النيل على سطرك
عشان خاطر ملامح عطرك الفايح
وخاطر قلبك الفوّاح
وخاطر توت وحتشبسوت
عشان خاطر آمون وبتاح
عشان خاطر يا بنت الإيه يا فلاحه
.............. بقيت فلاّح
