أحمد أبو سنة - مصر
فوق حيطان الليل معانده
ضحكة الأحلام معانا
والقلوب طارحه المودة
بس بتقيّد خطانا
فوق جبين الحق باين
الأمم فيها المداين
واقفه تستنظر فى فارس
يجي فينا يشد شدَّه
صح موج البحر عالي
والمظالم برضه سدَّه
بس صوتك جواه دانه
شايله صرخه بالمودّة
قوم وسن حروف لسانك
وارفع المدنه بأذانك
واضرب الظالم بقوه
ده الحروف بالحق حادّة
يرجع الحق لصحابه
يفرح الحرف اللى جابه
يومها بس نغني فرحه
فى البلاد ونمد مدَّه
هوبَّا ياللاه مين معانا
اكتب الاسم اللى جانا
فوق حيطان الليل أسامي
حقها فينا معاهدة
مصر يا ام الاسم غالي
لسه فينا الدم ساري
ومهما كان فى حروفنا قسوه
ده القساوه من المحبه
