مروة فرحات – مصر
أقسم معايا الليله دي كدبه
واحسبها ضحكة لروحي قبل الموت
وإرسم شجر لكلامي ف السكه
م بشوفها ضل خريفي لو هيغوت
خليك سكوت وقت الصخب والضيم
خليك كريم واسمح دموع روحي
خليني اهرب م المطر والغيم
واهديلي بوسة تراضي ف جروحي
رجعني طفلة الليله دي وخلاص
وإرسمني كاس واشربني براحه
لو بس ليله بلاش نخلصها
وبلاش عيونا تقولها بصراحه
خلينا نكدب حتى على روحنا
يمكن جروحنا تطيب كدا يمكن
واديني جرعه كبيرة م الأحضان
أجل صباحنا ليالي أو أمكن
احقن وريدي مخدرات أشعار
وادهن جدار الروح بمش همشي
اوعدني أن الحب مش هيموت
وإرسملي نور فوق كحل ما ينامشي
