أحمد رجب سلامة - مصر
اقولك بحبك .. وأكدب عليكى
وارسم ف صورتك .. والون عينيكى
وأضحك ف وشك واخبى الحقايق
واغشك .. وابان انى واحد منافق
وابوسلك إيديكى .. !
وعايزانى سلبى وأغضب ف ربى
واطيعك وبس .. !
وعايزانى بارد ومبقاش بحس .. !
ورافضه انى أطلع ف وسط الخلايق
واقولك كفايه .. ولو بالاشاره
مانا اصلى واحد .. بدوق المراره
ومن كتر صمته
حس ان حالته .. بتشبه لخرس .. !
وعايزانى فيكى .. هامان اللى ليكى
بيحكم امارتك ويظبط أمورك
يمثل سيادتك .. غيابك حضورك
ويقبل بحزنك ويرفض سرورك
ويهدم ف سورك .. !
ويصدر أوامره بقطع اللسان ..
انا مش هامان .. !
ولا انتى المدانه
لكنك خلفتى العهود اللى بينا
وخنتى الأمانه .. !
وعدتينى مره بإنك حنونه
وطبطبتى يومها على كتافى دول
وكام الف مره كتافى احتاجولك
وياما نادولك
رفضتى المثول .. !
وآخرتها ماذا
يا بنت الأكابر
أنا الشعب أصبح بيشبه لبعض
وكل الأسامى بتشبه لبعض
مثابر وصابر ،، ومؤمن وكافر
وكل اما اعافر واسافر _ سماكى
بتقلب لأرض .. !
قوليلى لماذا كتبتى عليا
اصلى النوافل .. واسيب الفروض
وأصنع ف شعرى كما يحلو ليكى
ومن غير م احسه .. بدون العروض
قتلتى المبادئ وكان ف اعتقادك
بإنى موافق أغير عقيدتى
لدين اليهود .. !
فسامحينى جدا
انا مش منافق
ولا يصح ليكى ف يوم السجود
قالتلى ببرود
وعلت ف صوتها
يا شمس استعدى .. وطفى الشموع
ويشهد جيرانك اذا البدر أقدم
هينوى الرجوع
انا المستبده وانا المستعده
احول هناكم لحزن ودموع
وانا المستقيمه بثبوت الأدله
ولست السقيمه ولا بيا عله
انا المستقله وانا المستغله
وانا المرتجاه . . !
وكل اللى ماتوا ودم اللى فاتوا
ده عمرى الاضافى وصوتى المنافى
لهذى الحياه
فلو تسمحيلى وتلقى البديل
انا مستقيل .. !
ورافض لحبك وكاره مداه
ومش مستحيل
تلاقى انى جنبك
واقولك بحبك
ف وقت اما احس
ان قربك نجاه ... !
