أحمد أبوسنة – مصر
قوم يااحمد
هات القله من الشباك
قوام ياابني عشان اشرب
وقوم ذاكر
عشان تبقى ياواد شاطر
ونام بدري عشان تقدر تقوم بدري
ولا تصاحب فى مدرستك غير الشاطرين
ولا تمشي وتتسكع على الترعه وع الدكاكين
انا عارفاك
مش امبارح كسرت عشانها حصالتك
ومن بدري بتعمل خيط وعوامه لصنارتك
عشان تصطاد
ياواد مش عارفه ايه نابك
بقيت بتسبنا وتغيب
وتفضل ليه هناك وحدك على الترعه
ومهما انادى على ودنك
ماهيش سامعه
ياواد بتحب ايه فيها
وكل يومين تمرمطني فى دقيق وعجين
عشان تطعم بيها السمكة
وترجعلى منيل طين
وما شاء الله عليك يابني
صحيح مرزق ومن يومك
وانا بشقي في شغل البيت
ولا ملاحقه شرا رابسو على هدومك
ياواد بتحب ايه فيها
ده عينك كل مابتلمع
بتدمع شط فى عنيها
وادي الترعة
سمكها راح
وميتها ماهيش رايحة فى غيط فلاح
كانها جد حزنانه على بعدك
وانا قلبي ياقلب الام
بيعيط عليك يابني
ياما نفسي تعود تاني
وتقرالى على قبري
سورة عم
وربع يس
وتتصدق على المساكين
....................
( حاضر ياامه ....)
