سعيد شحاتة – مصر

أتوب.. جايز
.... ومش لازم تتوبي
ومش لازم أشيلك من ذنوبي
أنا أذنبت.. والذنب إني عاشقك
وعشقك رُقعه بتزوّق لي توبي
***
أتوب.. يمكن
.... وقولي لأهلي تايب
وراجع وسطكم رغم إنه غايب
متيّم بالورود اللي ف ملامحي
وعاشق شاب.. بس ف عشقه شايب
***
أتوب.. قادر
.. وأعيش قدّيس وآيه
بشرط تكوني سجّادتي وصلايا
أعيشك بين صحاري القلب زمزم
..... ولو قتلوني تبقي لقبري رايه
***
بأحبّك بس مش عارف أعبّر
ومش قادر أقول حبّيب وغاوي
صُبرت ولسّه بأتصبّر وأصبّر
وبلْوه تمُرّ يبلوني ببلاوي
أقول عاشق واخاف أصرخ واخبّر
يجاهر بالوجع قلبي المخاوي
وليد الفُجر في رحابك يكبّر
وطير الفَجر مقتول ع القهاوي
سكات في سكات وسهم الخوف تجبّر
وأجبرتيني ع الموت والغناوي
قتيل وكإنّ عشقك شيء مدبّر
وروحك محتوى كتابي السماوي