رشا فؤاد – مصر

(1)
هو كده عمرى
آله حاسبه 123 مع علامات الكسر
ماتكملوش القسمه مفيش بديل
رقم صفر..............
مسجون ف الخانه الشمال على صفحات النت
لإن البحث المطلوب مجهول
والوضع المقلوب أحكام عرفيه عليه
بالطبع مفيش قدامه غيرالارتواء بحلمى
بيت ضغنن من أمنيات بطعم النسكافيه
على وشه كل الصحاب قلبها أبيض
حالة مفارقه.....
بتحجز كل الخانات بالغصب
لقطع الحبل الواصل بالسجان
علشان تتولد من دايرة الأرقام
دقات على قلبى المركون فى آخر السطر بالعلامات نقط
ينزل فرمانها ف كل حارات الشعر
بإعاده تغليف النص باستكمال الحسبه 456 للوصول للحل
يمكن أنكتب لحظه وصول الختام 789
ويفضل رقم 10
محتفظ باللعز لفك الشفرة بعد موتى
للوصول للسر
وساعتها بس يفرقوا الدعوات عليه رحمه ونور
ويفرقونى على روحهم بالنميمه تسالى ليوم القيامه
(2)
على كتف الشجر
الدنيا مليانه سما
بتمطر عيال على وش الأرض تلعب رمله
ف الهوى تكبر تحب
أضحك اوى بتوكه روز على شعر بيبى ف الشيفون تبتسم
فتكبر الأيام
وانا على كتف الشجر
حضنه اللى فيه العصافير تنام ع البوح بالغنا
(3)
من جوه الكاميرا
يادوب
باكتب روحى بلقطه زووم ع النص
يمكن أسجل تفاصيلى
الماشيه على الكورنيش
ف الحلم اللى بيضحك فيه لسه عياط
رغم الشعر المنحوت جوايا
بيسمع صوت العصافير يرقص
ويسمع صوت قلبى يحب

(4)
انا قلبى كمانجه
بيشرب بمزاجه
الشعر موسيقى على النص
هو انتو ماشفتوش الرقص النازل من روحى
قصايد على خطواتى
المرسومه بكعب المانيكان ع الشارع
معلش مسامحاكوا
يمكن علشان تفاصيلكم لسه
ماحضنتش وشى المرسوم
على لعب الشارع أطفال
ضحك
هذار
كوتشينه لنص الليل
رهانات ع العمر