عيد بن عودة الدويغري - سيناء | مصر
مـــرت عليــنا أيام وسنيــن عســـرات
من حـــي حـــر القيـــض حــرّق كبدنا
//
اللـي اجرحونا اجروحهوا إساع حيات
ولحـالنـــا مـــن حمّهــــــن مابــــــردنا
//
ع دارسين الطـــب نشكى الوجيــعات
ودنا دوا مــن عندهــــوا ماوجــــــدنا
//
جانا الطبيب وجاب كشــف الأشــعات
قالــــوا سليـــم الجســـم يومٌ رقـــدنا
//
وأحـنا نقاسي م الوجـــاع الجسيـمات
ي مجربيـــن الشــوووق حرة صهــدنا
//
لتسكنـــــونا في قصـــــور وســرايات
نســــأل عليـــه وكـــل مارق نشــــدنا
//
نسأل عليه بخلاص ونفـــوس طلقات
وما عمـــرنا فــي يوم منّـــه حقــــدنا
//
نظـرة سبـاب أوجاعــنا وســت كلمات
حبــل المــودة امــع الصويحب عقدنا
//
واليـــوم ســـرنا انقولها قصــة أبيات
والله علــى إللى بدوس رايه حسـدنا
//
ياما مشيــنا مـــع الدروب الطويلات
نجري ورى الغـزلان بآخر جهـــدنا
//
ثاريــــت مــن غـــاد فيــها ملفــــات
نحسـاب ودنا إنصيد وإحــنا إنصـدنا
//
ما ينفــع التمسيك في شي لــنّ فات
معكـــوا زرعــنا وزرعنا ماحصدنا
//
ومــع غيــرنا يا خل عايــش بلذات
وأحـنا بغيــر أصحاب سرنا وحدنا
//
فَـرْقَ الحبايــب لا عبـالك سهيـلات
نصبر علـى المكتـوب هذى وعـدنا
//
ياريت لـنّ الرجـل من غاد ماجات
وياريـــت لنّــه بجانبـــك ماقعــدنا
//
عقّــــل عليّ وقــال مثلي كثيـــرات
لابد تلقى أصحـــــــاب زينة بعــدنا
//
هيهات مثلك نوجد أصحاب هيهات
من غيـــر منتا تقــولها إحنا شهـدنا
//
يامـا هوانا إبيــــار وبيار حلـــوات
و ع غيــر خاطر بير مالـح وردنا
//
نرضى بحكــم خالق الكون بالـذات
نشكى على اللي ماش غيـره عبدنا
