وعد الهوى


محمد ربيع محمد | مصر

يا قلبي مين علّمك ...
تغزل خيوط الشوق
وتلمّ عطر الصور ...
من شرفة الأحباب ؟
 مجروح وزرعك دِبِل  ……
 ولا حلْم بانْ لُهْ علام
وانا كل ما ارسم قمر ......
 واستنَّى يرمي الضي ....
يفرد سواد الليل ....
كفٌّه علي الأبواب
يا راوي عطشك ألم ...
عشمان يهلّ العيد
ابدر حنينك عمل ...
مع ضحكه لون السعد
يا قلبي مين علّمك
ترمي الوداد بالصدّ ؟
لو كنت سالِك طريق
رابط بدايتُه بْوعد
تقطع خيوط البعاد
والغربه نابْها عنيد
بتشقّ صدر الحنين…..
 وتلمّ الف نهار .....
قبلن يحلّ الغروب
مع بحر قلبُه غويط .
ومنين تجينا النجاه ...
والموج ف ساحْتُه غريق
مجروحه عينك معاه
والنوَّه نوّاحه
افرد إديك مجاديف
سنّد على قلبك
يمكن يهلّ مناخ ....
يخمد زئير الريح
ويلاقي فرْحك مداه
مع ضحكه بتصاحبهُ
وعشان تنول المراد
حدّد مناط الشط
يا قلبي مين علّمك
تتهجَّى سحر نَداك
في عشقُه للأزهار
فيطوف صباح الحياه
على كلّ نبته ف غيط
 وانا كلّ ما افرد قدم
وافرش بساط عدَلِك
بتلمّي ليه الزهور ....
من فوق غصون شجرك !!
إمتى السنابل تفوق
وتغنّي فوق أرضك
فيكون لعشقِك حصاد
مشتاق لطلّة شروق
أو شهد طعمُه أمل
متاريس طريقِك فولاذ
قتلت عيون السهل
يا قلبي مين علّمك
تتوضَّى بدموعك
وتقيم سرادق بكا …
للمحرومين مِ الحب
ما تصلّي ركعة أمان
ما دمت مش ضامن
يتفكّ قيد الشيطان ....
على سِلْمك المعتاد
فتْتُوه جميع السكك …
في عقلك النابض
                                                                 شعر
 محمد ربيع محمد

 

تعليق عبر الفيس بوك