مروة فرحات – مصر
هرد على البعاد بسكوت
وهصرخ بس من غير صوت
واخبي دموعي فيا وبس
لحد ماجرح قلبي يموت
هاضُم الكحل واتزوّق
واحنّي العمر واصدّق
بإن ف بعدنا غنوة
يشم عبيرها لما يفوت
يفكر ان انا نسياه
وبعده الروح ما شافت اه
ويمكن بعده ألقي حبيب
يكون ضل وشجر وبيوت
مابيفيدش البكا اوقات
هاداوي جرح قلبي سكات
يبات قلبي مع جروحه
يقوم عقد الهوى مفروط
هعيش بعده وهتهدى النار
والاقي اللي يكونلي الدار
وبكره جايلنا بأسرار
نهار كان بين إديه مربوط
خلاص غيبنا وكان ياما كان
ماعادشي لشوق قلوبنا مكان
وطول منا عايشه في الاحزان
ميزان العدل مش مظبوط
