محمد ربيع | مصر
الشجر المحمي بأشواكه
بتهزه بقسوه جنود الريح
والورق المفروش سجاده
بتلمه عشوش العصافير.
من غير الألم المتوقع
لو يدك حضنت أغصانه
أو قدمك طلعت على جزعه
والوردة اللي ف قلب الخوف
بتبص بحرقه على عيونك
مش عارفة بشوقها تعديلك
فبترسل ف عطور فواحه
بتخاطب فيك الإحساس
خليها قريب من قلبك
واستنشق ف عبير طلتها
تفرح لك ف النور أمانيك
ربك بالستر يعدلها
كم مره .....
حاولت أبص لها
والسور العالي بيتاوب
موجوعه عيونه السهرانه
مع باب بيعاند فى الخطوه
من ألمه بيفضل مقفول
لو مره أخش ف دهاليزك
هاخلع صبارك من جدره
واغرس لك اشجار طراحه
وزهور بتفتح مفاتنها ...
مع صبح
اتنفس بنداه
