في مَنْور بيتنا


نهال محسن - مصر


في منور بيتنا حكاوي كتير .. تسمعها طول النهار والليل
تسمع صوت أطباق وصواني .. وأكله تخلص في ثواني
وريحة طبخ وتسبيكه .. و روزماري وبابريكا
وتتلم العيله ع السفره .. ولو بجبنه وفول قِدرَه
وتسمع ضحكه مهووسه.. بين عريس جديد وعروسه
بتتدلل وتتدلَّع .. والحب في الدره مولّع
وأم ايدها علي خدها.. سهرانه الليل تدعي لابنها
يكون معاه ربه ويهديه.. في غربته ويحافظ عليه
أو تسمع صرخة طفل رضيع .. وأم من السهر بتضيع
أطفال بتذاكر و أَلِفْ بِهْ .. وتنطيطهم (بابا جه .. بابا جه)
ودعاء طنط أحلام  ..يرجع جوزها بسلام
أصله ضابط في جنوب سينا .. بيضحِّي عشان يحمينا
وأنكل فادي وطنط جانيت .. وخناقهم علي مصروف البيت
( الكهربا غاليه شيلو الفيشه) .. الله يعينهم ع العيشه
بيسبحوا ويقولو ترانيم .. مع ولادهم .. ميشيل و روزين
ولاَّ صوت جارنا الحج حسين .. في معاده اليومي الساعه اتنين
بيتهجَّد مع طنط ساره .. وصوته يملا كل العماره
ورود وعبير .. وملايكه كتير
ودي أجمل حاجه في المنور .. ومن أجمل ماتتصوَّر
ترانيم علي ترتيل .. إنجيل وقرآن كريم
ده في منور بيتنا حكاوي كتير .. تسمعها طول النهار والليل.

 

تعليق عبر الفيس بوك